Azərbaycan iqtisadiyyatı 10 il geriyə qayıdıb

Azərbaycan iqtisadiyyatı 10 il geriyə qayıdıb

Ötən il Azərbaycanda 60 milyard manatlıq (37 milyard 588,7 milyon dollar) Ümumi Daxili Məhsul (ÜDM) istehsal olunub. Bu, 3,8 faiz azalma deməkdir. Amma dollar ifadəsiylə əlavə dəyər istehsalı daha kəskin - 29,1 faiz azalıb.

AzadlıqRadiosu-na bu məlumatı Dövlət Statistika Komitəsi (DSK) verib.

15 milyard dollar geriləmə

Rəsmi məlumata görə, ölkənin ötənilki ÜDM həcmi (37 milyard 588,7 milyon ABŞ dolları) 2015-ci ildəkindən 15 milyard 381 milyon dollar azdır.

ÜDM artımı neftin qiymətindən qaynaqlanırdı

Azərbaycanda ÜDM istehsalının azalması ilə dəfə 2009-cü ildə - ümumdünya maliyyə və iqtisadi böhranı fonunda neft ucuzlaşanda və işgüzar fəallıq geriləyəndə qeydə alınmışdı. Həmin il ÜDM 48,8 milyarddan 44,3 milyard dollara düşmüşdü. Növbəti illərdə artım bərpa olundu və 2014-cü ildə neftin bahalaşması və manatın möhkəmlənməsi sayəsində ən yüksək həddə - 75 milyard 237 milyon dollara yüksəldi.

Bir ildə 30 faiz azalma

Adambaşına ÜDM istehsalı 2007-ci il səviyyəsinə düşüb. Ötən il adambaşına ÜDM 3 min 899,90 dollar, 9 il əvvəlsə 3 min 841,70 dollar olub. Son bir ildə adambaşına ÜDM 30 faiz əskilib. Hətta bu geriləmə fonunda belə, hökumət əhalinin yoxsuluq səviyyəsinin əvvəlki kimi 5 faiz həndəvərində olduğunu bəyan edir.

Hədəf 13 min dollar idi, fakt 3 min 900-dür

Azərbaycan prezidentinin 2012-ci il 29 dekabr tarixli fərmanı ilə təsdiqlənmiş «Azərbaycan 2020: Gələcəyə baxış» inkişaf konsepsiyasında 2020-ci ildə ÜDM- istehsalının iki dəfə artıraraq inkişaf etmiş ölkələr səviyyəsinə - adambaşına 13 min dollara çatdırmaq hədəf götürülmüşdü. Hələlik, bunun əksi baş verir: 2012-ci ildən bəri adambaşına ÜDM istehsalı iki dəfə azalıb.

Azərbaycanın qonşuları və «qonşuları»: Gürcüstan, Ermənistan, Tunis və Paraqvay Beynəlxalq hesabatlara görə, hazırda Azərbaycan adambaşına ÜDM-ə görə Tunis, Paraqvay, Monqolustan, İndoneziya, Şri Lanka, Gürcüstan və Ermənistanla bir cərgədə durur. Bu ölkələrdə adambaşına ÜDM istehsalı 3 min 600-3 min 900 dollar civarındadır.

Bu il hamı artım olacağını deyir

Azərbaycan hökuməti bu il ÜDM-in real artımının 1 faiz olacağını proqnozlaşdırır. Beynəlxalq maliyyə qurumları və kredit agentlikləri daha nikbindirlər və 1,4 faizədək artımın olacağını güman edirlər.

Ötən ilin dekabrında təsdiqlənmiş Strateji Yol Xəritəsinə əsasən, 2025-ci ilədək olan dövrdə hökumət ÜDM-in orta illik real artım tempinin 3 faizi aşacağını hədəf götürüb.



İSTİFADƏ QAYDALARI

Müəllif hüquqları qorunur.
Məlumatdan istifadə etdikdə istinad mütləqdir.
Məlumat internet səhifələrində istifadə edildikdə müvafiq keçidin qoyulması mütləqdir.